Probecha di temporada di awa pa muha mata

 

“Nos ta duna tips con pa spaar awa y alabes cosecha fruta y berdura fresco na cas”

For di october Aruba a drenta den temporada di awa, cual por trese hopi beneficio cune specialmente pa e agricultornan.

Mirando e  prijs halto di awa na Aruba, nos ta conseha tur agricultor pa probecha di e temporada aki pa planta y cosecha fruta y berduranan fresco, organico y na costo baho den propio cura di cas of riba cunuku.

 

 

Fruta y berduranan organico cosecha na cas a demostra di ta hopi mas benificioso pa e salud humano, pa motibo cu nan ta liber di pestisida cu por causa malesanan manera entre otro cancer.  

Un di e maneranan mas facil pa colecta awa cu ta yobe ta dor di haci uso di un bari. Esaki por wordo poni den cura di cas of cunuku y asina colecta e awa facilmente.

Esnan cu kier colecta mas awa por haci uso di un “regen goot” cu ta wordo instala riba e rand di e dak di cas y ta manda e awa den un solo direccion (den un bari grandi). Tambe  por construi un beerput special pa awa cu ta yobe, cual ta ideal pa agricultornan cu cunuku grandi y hopi mata pa muha.

Despues cu e awa aki wordo colecta e por wordo usa pa entre otro muha mata, laba floer of laba auto, asina reduciendo e gastonan di awa.

Nos tin diferente matanan na benta manera entre otro mata di guyaba, lamoenchi, apelsina, scopapel, tamarijn, awacati, y como tambe diferente simiyanan manera ciboyo, tomati, pak choy, okra, patia y ta conseha pueblo completo pa probecha di e temporada aki pa cuminsa cu e bunita practica di agricultura.

Pa mas informacion of tipsnan con pa planta na cas por tuma contacto cu nos na # 585 8102 of pasa personalmente y cumpra mata, simiya y foyeto informativo. 

Social Media

Facebook Twitter

Departamento di Agricultura, Cria y Pesca/Santa Rosa

Piedra Plat 114-A
Paradera
Aruba
tel.: (297) 585-8102
fax: (297) 585-5639
email: This e-mail address is being protected from spambots. You need JavaScript enabled to view it.